2019.06.03,

Նյուսրում

Նախարար Բաթոյանը, նրան ուղղված հարցերն ու անձնական տարածքը

author_posts/gayane-asryan
Գայանե Ասրյան

Լրագրող

Մարդու իրավունքների պաշտպանությամբ զբաղվող տեղական հասարակական կազմակերպությունները Աշխատանքի և սոցիալական հարցերի նախարար Զարուհի Բաթոյանին աջակցող հայտարարություն են տարածել:

Նախարար Զարուհի Բաթոյանի՝ Shabat.am-ին տված հարցազրույցը Ֆեսյբուքում ու Յություբում օգտագործվեց ատելության խոսք տարածելու համար: Նախարարի՝ սեռականության ու սեռական դաստիարակության թեմայով մեկնաբանությունները թիրախավորվեցին և օգտագործվեցին նրա դեմ:

Կազմակերպությունները հայտարարության մեջ նշել են, որ ատելության քարոզարշավները որպես շղարշ են օգտագործվում քաղաքական նպատակների իրագործման համար:

«Կնատյաց և սեռականացված բառապաշարով Տիկին Բաթոյանի թիրախավորումը վկայում է մեր երկրում սեռով և հաշմանդամությամբ պայմանավորված խտրականության խորը արմատավորված խնդրի և խտրականության դեմ ուղղած գործողությունների անբավարար մակարդակի մասին»,-ասված է հայտարարության մեջ:

Նախարարի հարցազրույցի յություբյան մեկնաբանությունները հիմնականում բացասական էին՝ ուղղված երկու կողմերին: Լրագրողին մեղադրում են սեռական թեմաներով հարցեր տալու համար, նախարարին էլ՝ այդ հարցերին անկեղծ պատասխանելու համար:

Shabat.am-ի խմբագրությունը պարզաբանում է, որ իրենք  որևէ պարտավորություն չունեն պաշտպանելու այս կամ այն բարձրաստիճան պաշտոնյային։ Եվ դա իրենց գործառույթը չէ:

«Մենք համարում ենք, որ հարցազրույցի արձագանքները հանրության տարբեր շերտեր ընկալել են յուրովի, իսկ բուն հարցազրույցը համարում ենք հաջողված թե՛ հյուրի, թե՛ հարցերի, թե՛ առհասարակ «փակ» թեմաներից խոսելու և կարծրատիպեր կոտրելու տեսանկյունից»,-նշում է կայքը:

Լրատվամիջոցի պարզաբանման մեջ ասվում է, որ մեդիայի հետ շփվող ցանկացած պետական ու քաղաքական գործիչ նախքան որևէ հարցազրույցի մասնակցելը պարտավոր է գնահատել բոլոր ռիսկերը, երբեմն նաև առավելությունները. «Համոզված ենք, որ Զարուհի Բաթոյանը կայացած ու ինքնաբավ գործիչ է և որևէ մեկի պաշտպանության կարիքը չունի»:

Թեման հետաքրքիր էր մարդկանց համար և Shabat.am-ի համար սպասելի էր, որ պետք է հասարակական ռեզոնանս առաջանար․ «Հարցազրույցը հանրությանը տվել է պատասխաններ կամ առաջացրել հարցեր։ Սա է մեր աշխատանքի ամենակարևոր արդյունքը և առհասարակ լրագրողական արտադրանքի հիմնական նպատակը: Հարցազրույցը ստացված էր, հետաքրքիր ու բավականին անկեղծ»։

«Փինք Արմենիա»-ի իրավաբան Հասմիկ Պետրոսյանն ասում է, որ լրատվամիջոցն այստեղ անելիք ունի, պետք է գտնի ճանապարհներ այլ տեսակետներ հրապարակելու, ինչու ոչ կարող է դատական կարգով պահանջել ներողություն խնդրել նախարարից:  

«Շատ դեպքերում խոսքի ազատությունը կարող է ավելի լայն մեկնաբանվել՝ որպես քննադատություն ուղղված պաշտոնատար անձին: Բաթոյանի արտահայտած դիրքորոշումներն անձնական տիրույթ տեղափոխելը ոչ թե նախարարի գործունեությանն ուղղված քննադատություն է, այլ նրա մասնավոր, ընտանեկան կյանքի իրավունքի խախտում»:

Իրավաբանը նաև նշում է, որ պաշտոնատար անձինք նման դեպքերում ավելի քիչ պաշտպանություն ունեն, քան իրավապաշտպաններն ու հասարակ քաղաքացիները․ «Oրենսդրական կարգավորման խնդիր ունենք: Իրավապահ մարմինները, բացի քաղաքական կամքի բացակայությունից, կարող են ատելության խոսքի տարածմանն ընդհանրապես ընթացք չտալ և հիմնավորվել հանցակազմի բացակայությամբ կամ այլ օրենսդրական բացթողումներով»:

Պետրոսյանը նշում է, որ, անկախ զբաղեցրած դիրքից, պաշտոնյան կարող է օգտվել Քաղաքացիական օրենսդրությամբ նախատեսված պաշտպանությունից, քանի որ այստեղ կա արժանապատվության նսեմացում, անհարգալից վերաբերմունք անձնական կյանքի հանդեպ:

Գայանե Ասրյան


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *